Pages

ಮೊದಲ ಬಾರಿಗೆ ಜಂಬೂ ನದಿ ತೀರದಲ್ಲಿ ಗಂಗಾರತಿ

ಕುಂದಾಪುರ: ತಾಲೂಕಿನ ಜಪ್ತಿ ಗ್ರಾಮದ ಜಂಬೂನದಿ ತೀರ ಅಪೂರ್ವ ವಿದ್ಯಾಮಾನಕ್ಕೊಂದು ಸಾಕ್ಷಿಯಾಯಿತು. ತಾಲೂಕಿನ ಇತಿಹಾಸದಲ್ಲಿಯೇ ಮೊದಲ ಬಾರಿಗೆ ಉತ್ತರ ಭಾರತದ ಮಾದರಿಯಲ್ಲಿ ಗಂಗಾರತಿ ಎಂಬ ವಿಶೇಷ ಪೂಜಾ ಕಾರ್ಯಕ್ರಮ ಸಂಪನ್ನಗೊಂಡಿತು. ಸಂಜೆ 5.30ರಿಂದ 7.30ರ ತನಕ ವಿದ್ವಾಂಸರು, ಋತ್ವಿಜರ ನೇತತ್ವದಲ್ಲಿ ಜಂಬೂ ನದಿ ತೀರದ ಜಂಬೂಕೇಶ್ವರ ದೇವಸ್ಥಾನದ ಭಾಗೀರಥಿ ಘಾಟ್‌ನಲ್ಲಿ ಗಂಗಾಮಾತೆಗೆ ಪೂಜೆ ಸಲ್ಲಿಸಲಾಯಿತು. 

ವೇದಮೂರ್ತಿ ಚೆನ್ನಕೇಶವ ಭಟ್, ವೇದಮೂರ್ತಿ ರಂಗನಾಥ ಭಾಗವತ ಮತ್ತು ಇನ್ನಿತರ ಋತ್ವಿಜರು ಗಂಗಾ ಕಲ್ಪೋಕ್ತ ಪೂಜೆಯನ್ನು ಶಾಸ್ತ್ರಾನುಸಾರ ನೆರವೇರಿಸಿದರು. ಭಾಗೀರಥಿ (ಗಂಗೆ) ಮಾತೆಯನ್ನು ವಿಧಿಪೂರ್ವಕ ಆಹ್ವಾನಿಸಿ ಮಂಗಳಾರತಿ ಬೆಳಗಲಾಯಿತು. ಬಳಿಕ ಜಂಬೂ ನದಿಯಲ್ಲಿ ನೂರಾರು ಭಕ್ತರು ದೀಪ ಬೆಳಗಿಸಿ ಕತಾರ್ಥರಾದರು. ಈ ಮೊದಲು ಜಂಬೂಕೇಶ್ವರ ದೇವರಿಗೆ ಸಹಸ್ರ ಬಿಲ್ವಾರ್ಚನೆ ಇತ್ಯಾದಿ ಪೂಜೆ ನಡೆಸಲಾಯಿತು. 

ಡಾ.ಬಿ.ವಿ.ಉಡುಪ ಗಂಗಾರತಿ ಕಾರ್ಯಕ್ರಮದ ನೇತತ್ವ ವಹಿಸಿದ್ದರು. ಕೊಲ್ಲೂರು ದೇವಳದ ಮಾಜಿ ಆಡಳಿತ ಮೊಕ್ತೇಸರ ಬಿ.ಎಂ.ಸುಕುಮಾರ ಶೆಟ್ಟಿ, ಉದ್ಯಮಿ ಸುರೇಶ್ ಕಾಮತ್, ಗೋರಕ್ಷಾ ಸಮಿತಿಯ ಪ್ರಮುಖ ರಘುವೀರ್ ನಗರಕರ್ ಮೊದಲಾದವರು ಉಪಸ್ಥಿತರಿದ್ದರು. ಗಂಗಾರತಿಗೋಸ್ಕರ ದೇವಳ ಪರಿಸರ ಹಾಗೂ ನದಿಪಾತ್ರದಲ್ಲಿ ವಿಶೇಷ ದೀಪಾಲಂಕಾರ ನಡೆಸಲಾಗಿತ್ತು. ಜಂಬೂನದಿ ದೀಪಾರಾಧನೆಯಿಂದ ಕಂಗೊಳಿಸಿತು. ಅಸಂಖ್ಯ ಭಕ್ತರು ಮನದುಂಬಿಕೊಂಡರು.

ನ.29: ಉಡುಪಿಯಲ್ಲಿ ರಾಜ್ಯ ಮಟ್ಟದ ಕ್ರೀಡಾಕೂಟ

ಉಡುಪಿ: ಜಿಲ್ಲಾ ಪಂಚಾಯಿತಿ, ಸಾರ್ವಜನಿಕ ಶಿಕ್ಷಣ ಇಲಾಖೆ ಹಾಗೂ ಉಡುಪಿಯ ಬಾಲಕಿಯರ ಸರಕಾರಿ ಪದವಿ ಪೂರ್ವ ಕಾಲೇಜಿನ ಸಂಯುಕ್ತ ಆಶ್ರಯದಲ್ಲಿ ನ.29ರಿಂದ ಡಿ.1ರವರೆಗೆ ರಾಜ್ಯ ಮಟ್ಟದ ಪ್ರೌಢಶಾಲಾ ಬಾಲಕ ಬಾಲಕಿಯರ ಹೊನಲು ಬೆಳಕಿನ ಕ್ರೀಡಾಕೂಟ ಉಡುಪಿ ಅಜ್ಜರಕಾಡಿನ ಜಿಲ್ಲಾ ಕ್ರೀಡಾಂಗಣದಲ್ಲಿ ನಡೆಯಲಿದೆ. ಜಿಲ್ಲಾ ಉಸ್ತುವಾರಿ ಸಚಿವ ವಿನಯ ಕುಮಾರ್ ಸೊರಕೆ ಅವರು ಶನಿವಾರ ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದರು. 

ಕ್ರೀಡಾಕೂಟವನ್ನು ನ.29ರಂದು ಸಂಜೆ 6 ಗಂಟೆಗೆ ರಾಜ್ಯ ಪ್ರಾಥಮಿಕ ಹಾಗೂ ಪ್ರೌಢ ಶಿಕ್ಷಣ ಸಚಿವ ಕಿಮ್ಮನೆ ರತ್ನಾಕರ ಉದ್ಘಾಟಿಸಲಿದ್ದಾರೆ. ಕ್ರೀಡಾ ಸಚಿವ ಅಭಯಚಂದ್ರ ಜೈನ್ ಕ್ರೀಡಾ ಧ್ವಜಾರೋಹಣ ಮಾಡಲಿದ್ದಾರೆ. ರಾಜ್ಯಸಭಾ ಸದಸ್ಯ ಆಸ್ಕರ್ ಫರ್ನಾಂಡಿಸ್ ಅವರು ಕ್ರೀಡಾ ಸ್ಮರಣ ಸಂಚಿಕೆ ಬಿಡುಗಡೆ ಮಾಡಲಿದ್ದಾರೆ. ಅಂತರಾಷ್ಟ್ರೀಯ ಕಬಡ್ಡಿ ಪಟು ಮಮತಾ ಪೂಜಾರಿ ಕ್ರೀಡಾ ಜ್ಯೋತಿ ಬೆಳಗಲಿದ್ದಾರೆ ಎಂದು ಅವರು ತಿಳಿಸಿದರು. 

ರಾಜ್ಯದ 34 ಶೈಕ್ಷಣಿಕ ಜಿಲ್ಲೆಗಳಿಂದ ಹಾಗೂ 2 ಕ್ರೀಡಾ ವಸತಿ ಶಾಲೆಗಳಿಂದ ಸುಮಾರು 2,500 ಕ್ರೀಡಾಪಟುಗಳು ಭಾಗವಹಿಸಲಿದ್ದಾರೆ. ಅವರ ಆತಿಥ್ಯ ಹಾಗೂ ಕ್ರೀಡಾಕೂಟಕ್ಕೆ ಸುಮಾರು 35 ಲಕ್ಷ ರೂ.ಖರ್ಚು ಅಂದಾಜಿಸಲಾಗಿದೆ. ಕ್ರೀಡಾಕೂಟ ಸುಲಲಿತವಾಗಿ ನಡೆಯಲು ವಿವಿಧ ಸಮಿತಿ ರಚಿಸಲಾಗಿದೆ. ಇಲ್ಲಿ ಪ್ರಥಮ ಹಾಗೂ ದ್ವಿತೀಯ ಸ್ಥಾನ ಪಡೆದ ಕ್ರೀಡಾಪಟುಗಳು ಡಿಸೆಂಬರ್‌ನಲ್ಲಿ ರಾಂಚಿಯಲ್ಲಿ ನಡೆಯುವ ರಾಷ್ಟ್ರಮಟ್ಟದ ಕ್ರೀಡಾಕೂಟಕ್ಕೆ ಆಯ್ಕೆಯಾಗಲಿದ್ದಾರೆ. 3 ದಿನಗಳ ಕಾಲ ನಡೆಯುವ ಈ ಕ್ರೀಡಾಕೂಟದಲ್ಲಿ ಬಾಲಕ ಮತ್ತು ಬಾಲಕಿಯರ ವಿಭಾಗದಲ್ಲಿ ಒಟ್ಟು 33 ಸ್ಪರ್ಧೆಗಳಿಂದ 99 ಪದಕಗಳು ನಿರ್ಧಾರವಾಗಲಿವೆ. ಮೊದಲ 3ಸ್ಥಾನ ಹಾಗೂ ದಾಖಲೆ ಮಾಡಿದ ಕ್ರೀಡಾಪಟುಗಳಿಗೆ ನಗದು ಬಹುಮಾನ ನೀಡಲಾಗುವುದು ಎಂದರು. 

ಸುದ್ದಿಗೋಷ್ಠಿಯಲ್ಲಿ ನಗರಸಭೆ ಅಧ್ಯಕ್ಷ ಯುವರಾಜ್ ಪುತ್ತೂರು, ತಾಪಂ ಅಧ್ಯಕ್ಷೆ ಸುನೀತಾ ನಾಯ್ಕ, ಜಿಪಂ ಉಪಕಾರ್ಯದರ್ಶಿ ವಿಜಯ ಕುಮಾರ್ ಶೆಟ್ಟಿ, ಕಾಲೇಜಿನ ಪ್ರಾಂಶುಪಾಲೆ ರಾಧಾಮಣಿ ಡಿ.ಎಸ್., ಡಿವೈಎಸ್ಪಿ ಡಾ.ಪ್ರಭುದೇವ ಮಾನೆ, ಜಿಲ್ಲಾ ದೈಹಿಕ ಶಿಕ್ಷಣಾಧಿಕಾರಿ ಸೀತಾನದಿ ವಿಠಲ ಶೆಟ್ಟಿ, ಆರ್ಥಿಕ ಸಮಿತಿ ಅಧ್ಯಕ್ಷ ರಮೇಶ್ ಕಾಂಚನ್, ಜಿಲ್ಲಾ ಆಡಳಿತ ಉಪನಿರ್ದೇಶಕ ದಿವಾಕರ ಶೆಟ್ಟಿ ಉಪಸ್ಥಿತರಿದ್ದರು. 

ಜಿಲ್ಲೆಯಲ್ಲಿ ಸಂಚರಿಸಲಿದೆ ಕ್ರೀಡಾರಥ: ರಾಜ್ಯ ಮಟ್ಟದ ಕ್ರೀಡಾಕೂಟಕ್ಕೆ ಪೂರ್ವಭಾವಿಯಾಗಿ ನ.27ರಂದು ಉಡುಪಿ ತೆಂಕಪೇಟೆಯ ಶ್ರೀ ವೆಂಕಟರಮಣ ದೇವಳದಿಂದ ಸುಸಜ್ಜಿತ ಕ್ರೀಡಾರಥಕ್ಕೆ ಚಾಲನೆ ನೀಡಲಾಗುವುದು. 3 ದಿನಗಳ ಕಾಲ ಜಿಲ್ಲೆಯಾದ್ಯಂತ ಸಂಚರಿಸಲಿರುವ ಈ ಕ್ರೀಡಾರಥ ನ.29ರಂದು ಉಡುಪಿಗೆ ಹಿಂದುರುಗಿದಾಗ ಸಂಭ್ರಮದ ಸ್ವಾಗತ ದೊರೆಯಲಿದೆ. ರಥಬೀದಿಯಲ್ಲಿ ಪರ್ಯಾಯ ಕಾಣಿಯೂರು ಶ್ರೀ ವಿದ್ಯಾವಲ್ಲಭ ತೀರ್ಥ ಸ್ವಾಮೀಜಿ ಅವರು ಈ ಸಂದರ್ಭದಲ್ಲಿ ಪುರಮೆರವಣಿಗೆಗೆ ಚಾಲನೆ ನೀಡಲಿದ್ದಾರೆ. ಕ್ರೀಡಾಕೂಟವು ಡಿ.1ರಂದು ಅಪರಾಹ್ನ 3-30ಕ್ಕೆ ಸಮಾರೋಪಗೊಳ್ಳಲಿದೆ 

ಜಿಲ್ಲಾ ಕ್ರೀಡಾಂಗಣ ಅಭಿವೃದ್ಧಿಗೆ 2.25 ಕೋಟಿ ರೂ.: ಅಜ್ಜರಕಾಡಿನ ಜಿಲ್ಲಾ ಕ್ರೀಡಾಂಗಣದ ಮೇಲ್ಛಾವಣಿ ಕಾಮಗಾರಿಗೆ ರಾಜ್ಯ ಸಭಾ ಸದಸ್ಯ ಆಸ್ಕರ್ ಫೆರ್ನಾಂಡಿಸ್ ಅವರು ತಮ್ಮ ಸಂಸದರ ನಿಧಿಯಿಂದ 1.25 ಕೋಟಿ ರೂ. ನೀಡಲಿದ್ದಾರೆ. ಇದಕ್ಕೆ ಮ್ಯಾಚಿಂಗ್ ಗ್ರ್ಯಾಂಟ್ ಆಗಿ ರಾಜ್ಯ ಕ್ರೀಡಾ ಸಚಿವ ಅಭಯಚಂದ್ರ ಜೈನ್ ಅವರು 1 ಕೋಟಿ ರೂ. ಬಿಡುಗಡೆ ಮಾಡಲಿದ್ದಾರೆ. ಇದರಲ್ಲಿ ಲಾನ್ ಟೆನ್ನಿಸ್ ಕೋರ್ಟ್ ನಿರ್ಮಿಸಲಾಗುವುದು. ಹೀಗೆ ಜಿಲ್ಲಾ ಕ್ರೀಡಾಂಗಣವನ್ನು ಸುಸಜ್ಜಿತವಾಗಿ ಎಲ್ಲಾ ಬಗೆಯ ಕ್ರೀಡೆಗಳಿಗೂ ಅವಕಾಶವಿರುವಂತೆ ಅಭಿವೃದ್ಧಿ ಪಡಿಸಲಾಗುವುದು ಎಂದು ಸುದ್ದಿಗೋಷ್ಠಿಯಲಿ ್ಲ ಉಪಸ್ಥಿತರಿದ್ದ ಶಾಸಕ ಪ್ರಮೋದ್ ಮಧ್ವರಾಜ್ ತಿಳಿಸಿದರು.

ಶರಣ್ ಶೆಟ್ಟಿ ಕೊಲೆ ಆರೋಪಿಗಳ ಬಿಡುಗಡೆ

ಕುಂದಾಪುರ: ತಾಲೂಕಿನ ಆನಗಳ್ಳಿ ರಸ್ತೆಯ ಸೈಮನ್ ಕಂಫರ್ಟ್ ವಸತಿಗಹದಲ್ಲಿ ಶರಣ್‌ಕುಮಾರ ಶೆಟ್ಟಿ (22) ಎಂಬಾತನನ್ನು ಚೂರಿಯಿಂದ ತಿವಿದು ಕೊಲೆ ಮಾಡಿದ ಆರೋಪ ಎದುರಿಸುತ್ತಿದ್ದ ಭರತ್‌ಕುಮಾರ್(23) ಹಾಗೂ ಪ್ರದೀಪ ಮೊಗವೀರ ಯಾನೆ ಗುಂಡಾ ಬಿಡುಗಡೆಗೊಂಡಿದ್ದಾರೆ. 
ಮೃತ ಶರಣ್ ಬಿಕಾಂ ವಿದ್ಯಾರ್ಥಿಯಾಗಿದ್ದು , ಬೈಕ್‌ನಲ್ಲಿ ಹೋಗುತ್ತಿದ್ದ ವೇಳೆ ಪೂರ್ವದ್ವೇಷದಿಂದ ಆರೋಪಿಗಳು 2012ರ ಮಾ.20ರಂದು ರಾತ್ರಿ 12.20ರ ಸುಮಾರಿಗೆ ಹತ್ಯೆಗೈದಿದ್ದರು ಎಂದು ಆರೋಪಿಸಲಾಗಿತ್ತು. ಮೃತ ಶರಣ್ ಕಾಲೇಜೊಂದರ ಪ್ರಿನ್ಸಿಪಾಲರನ್ನು ಬ್ಲ್ಯಾಕ್‌ಮೇಲ್ ಮಾಡಿದ ಆರೋಪ ಎದುರಿಸುತ್ತಿದ್ದ. ಕುಂದಾಪುರ ಪೊಲೀಸರು ಆರೋಪಿಗಳನ್ನು ಬಂಧಿಸಿ ನ್ಯಾಯಾಲಯಕ್ಕೆ ಚಾರ್ಜ್‌ಶೀಟ್ ಸಲ್ಲಿಸಿದ್ದರು. 
ಪ್ರಕರಣದ ವಿಚಾರಣೆ ನಡೆಸಿದ ಕುಂದಾಪುರ ಹೆಚ್ಚುವರಿ ಜಿಲ್ಲಾ ಹಾಗೂ ಸೆಶನ್ಸ್ ನ್ಯಾಯಾಧೀಶ ರಾಜಶೇಖರ ವೆಂಕನಗೌಡ ಪಾಟೀಲ್ ಆರೋಪಿಗಳ ವಿರುದ್ಧ ಮಾಡಲಾದ ಆರೋಪಗಳು ಸಾಕ್ಷ್ಯಾಧಾರಗಳಿಂದ ರುಜುವಾತಾಗಿಲ್ಲವೆಂದು ಮನಗಂಡು ಬಿಡುಗಡೆಗೊಳಿಸಿದ್ದಾರೆ. ಆರೋಪಿಗಳ ಪರ ಕುಂದಾಪುರ ನ್ಯಾಯವಾದಿ ರವಿಕಿರಣ್ ಮುರ್ಡೇಶ್ವರ ವಾದಿಸಿದ್ದರು.

ಇಷ್ಟವಾಯ್ತು, ಮೆಚ್ಚುಗೆಗೂ ಪಾತ್ರವಾಯ್ತು ಕಾರ್ಟೂನು ಹಬ್ಬ - 14

   ಕುಂದಾಪ್ರ ಕಾರ್ಟೂನು ಹಬ್ಬದ ಎರಡೂ ದಿನ ಅಧಿಕ ಸಂಖ್ಯೆಯಲ್ಲಿ ಆಗಮಿಸಿದ ಜನಸಮೂಹ ತಮ್ಮೊಳಗಿನ ಕಾರ್ಟೂನು ಪ್ರೀತಿಯನ್ನು ಸಾಕ್ಷೀಕರಿಸಿದರು. ಎರಡನೇ ದಿನ ವಿದ್ಯಾರ್ಥಿಗಳು ಹಾಗೂ ಉತ್ಸಾಹಿಗಳಿಗಾಗಿ ಕಾರ್ಟೂನು ಕಾರ್ಯಾಗಾರವನ್ನು ಏರ್ಪಡಿಸಲಾಗಿತ್ತು. ಈ ಕಾರ್ಯಾಗಾರದಲ್ಲಿ ಮಕ್ಕಳೂ ಸೇರಿದಂತೆ ಸುಮಾರು 70ಕ್ಕೂ ಅಧಿಕ ಮಂದಿ ಭಾಗವಹಿಸಿ ವ್ಯಂಗ್ಯಚಿತ್ರ ರಚನೆಯ ಹಲವು ಸುಲಭ ವಿಧಾನಗಳನ್ನು ಸತೀಶ್‌ ಆಚಾರ್ಯ, ಜೇಮ್ಸ್‌ವಾಜ್‌, ಸಂತೋಷ್‌ ಸಸಿಹಿತ್ಲು, ರಾಮಕೃಷ್ಣ ಹೇರ್ಳೆ ಮುಂತಾದವರಿಂದ ಕಲಿತರು.
ಕಾರ್ಟೂನ್ ಮೇಸ್ಟ್ರು... ಸತೀಶ್ ಆಚಾರ್ಯ
    ನಿರೀಕ್ಷೆಗೂ ಮೀರಿ ಮಕ್ಕಳು ಕಾರ್ಟೂನು ಹಬ್ಬದಲ್ಲಿ ಪಾಲ್ಗೊಂಡಿದ್ದ ವಿಶೇಷವಾಗಿತ್ತು. ಕಾರ್ಟೂನು ಕಾರ್ಯಾಗಾರದಲ್ಲಿ ಮಾತ್ರವಲದಲದೇ ಹಬ್ಬದಲ್ಲಿ ಆಯೋಜಿಸಲಾದ ವಿವಿಧ ಸ್ವರ್ಧೆಗಳಲ್ಲಿಯೂ ಮಕ್ಕಳೂ ಉತ್ಸಾಹದಿಂದ ಭಾಗಿಯಾದದ್ದು ಕಂಡುಬಂತು. 
     ಕಾರ್ಟೂನು ಹಬ್ಬದಲ್ಲಿ ಕ್ಯಾರಿಕೇಚರ ರಚನೆಗೆ ವಿಶೇಷ ಬೇಡಿಕೆ ಇದ್ದದ್ದು ಕಂಡುಬಂತು. ಕಾರ್ಟೂನು ಕುಂದಾಪ್ರ ತಂಡ ಹಲವರ ಕ್ಯಾರಿಕೇಚರನ್ನು ಸ್ಥಳದಲ್ಲಿಯೇ ಚಿತ್ರಿಸಿ ಕೊಟ್ಟರು. ಕಾರ್ಟೂನ್ ಪ್ರೀಯರು ಕ್ಯಾನ್ವಾಸ್ ತುಂಬೆಲ್ಲಾ ಗೀಚಿ, ಸೆಲ್ಫಿ ತೆಗೆದುಕೊಂಡು, ಕಾರ್ಟೂನುಗಳಿಗೆ ಡೈಲಾಗ್ ಬರೆದು ಸಂಭ್ರಮಿಸಿದರು. ಹಿರಿಯ ಕಾರ್ಟೂನಿಷ್ಟ್ ರಾಮಕೃಷ್ಣ ಹರ್ಳೆಯವರ ನಿರೂಪಣೆ ಕಾರ್ಯಕ್ರಮದಲ್ಲಿ ಗಮನ ಸೆಳೆಯಿತು.
    ಕಾರ್ಟೂನು ಹಬ್ಬವನ್ನು ಕಣ್ತುಂಬಿಕೊಳ್ಳಲೆಂದು ದೂರದ ಬೆಂಗಳೂರು, ಶಿವಮೊಗ್ಗ, ಸಾಗರ, ತೀರ್ಥಹಳ್ಳಿ, ಮಂಗಳೂರು, ಮೂಡುಬಿದಿರೆ ಮುಂತಾದೆಡೆಯಿಂದ ಕಾರ್ಟೂನು ಪ್ರೀಯರು ಆಗಮಿಸಿ ಕಾರ್ಯಕ್ರಮಕ್ಕೆ ಹೊಸ ಹುರುಪು ನೀಡಿದರಲ್ಲದೇ ವಿವಿಧೆಡೆ ಕಾರ್ಟೂನು ಹಬ್ಬವನ್ನು ಆಯೋಜಿಸಲು ಆಹ್ವಾನಿಸಿದರು.
   ಕುಂದಾಪುರ ವ್ಯಂಗ್ಯಚಿತ್ರಕಾರರಾದ ಚಂದ್ರ ಗಂಗೊಳ್ಳಿ, ಕೇಶವ ಸಸಿಹಿತ್ಲು, ಚಂದ್ರಶೇಖರ ಶೆಟ್ಟಿ ಮೊದಲಾದವರು ಕಾರ್ಟೂನು ಹಬ್ಬದಲ್ಲಿ ಉಪಸ್ಥಿತರಿದ್ದರು.
      ಎರಡನೇ ದಿನದ ತಡರಾತ್ರಿಯವರಗೂ ಕಾರ್ಟೂನು ವೀಕ್ಷಣೆಗೆ ಜನ ಬರುತ್ತಲೇ ಇರುವುದು ಕಂಡುಬಂತು. ಒಟ್ಟಿನಲ್ಲಿ ಕುಂದಾಪುರದಲ್ಲಿ ನಡೆದ ಈ ವಿನೂತನ ಕಾರ್ಯಕ್ರಮದ ಹಾಗೂ ಸತೀಶ್ ಆಚಾರ್ಯ ನೇತೃತ್ವದ ಕಾರ್ಟೂನು ಕುಂದಾಪ್ರ ತಂಡದ ಕಾರ್ಯವೈಖರಿ ನಾಗರೀಕರ ಮೆಚ್ಚುಗ ಪಾತ್ರವಾಯಿತು.
ಕುಂದಾಪ್ರ ಕಾರ್ಟೂನು ಹಬ್ಬದ ವಿಶೇಷ ಚಿತ್ರ ವರದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
ಕುಂದಾಪ್ರ ಕಾರ್ಟೂನು ಹಬ್ಬದ ಮೊದಲ ದಿನದ ಛಾಯಾಚಿತ್ರಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
ಕುಂದಾಪ್ರ ಕಾರ್ಟೂನು ಹಬ್ಬದ ಎರಡನೇ ದಿನದ ಛಾಯಾಚಿತ್ರಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ























































 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com