Pages

ಮೀನುಗಾರರ ಸಮಸ್ಯೆ ಶೀಘ್ರ ಪರಿಹಾರ - ಸಚಿವ

ಕೋಟ: ಮೀನುಗಾರಿಕೆಯಲ್ಲಿ ಎದುರಾಗುವ ಸಮಸ್ಯೆ ಶೀಘ್ರ ಪರಿಹಾರವಾಗಬೇಕು. ಬಂದರು ಮುಂತಾದ ಕಾಮಗಾರಿಗಳು ನಿಗದಿತ ಅವಧಿಯಲ್ಲಿ ಪೂರ್ಣಗೊಳ್ಳಬೇಕು. ಒಟ್ಟಾರೆ ಮೀನುಗಾರರ ಸಮಸ್ಯೆಗೆ ಶೀಘ್ರ ಪರಿಹಾರ ದೊರಕಬೇಕು ಎಂದು ಬಂದರು ಹಾಗೂ ಜವಳಿ ಸಚಿವ ಬಾಬು ರಾವ್‌ ಚಿಂಚನಸೂರು ಹೇಳಿದರು.

ಅವರು  ಮಾಬುಕಳ, ಹಂಗಾರಕಟ್ಟೆ, ಮೀನುಗಾರಿಕೆ ಜಟ್ಟಿ ಹಾಗೂ ಬಾರ್ಜ್‌ ಕಾಮಗಾರಿಯ ವೀಕ್ಷಣೆಗೆ ಆಗಮಿಸಿದ ಸಂದರ್ಭ ಪರ್ತಕರ್ತರೊಂದಿಗೆ ಮಾತನಾಡಿದರು.

ತಾನು ಮೀನುಗಾರ ಕುಟುಂಬಕ್ಕೆ ಸೇರಿದ್ದು ಈ ಜನಾಂಗದ ಎಲ್ಲ ಸಮಸ್ಯೆಗಳು ನನಗೆ ತಿಳಿದಿದೆ. ಅವರ ಸಮಸ್ಯೆಯ ಕುರಿತು ಹೆಚ್ಚಿನ ಅವಲೋಕನಕ್ಕಾಗಿ ಕರಾವಳಿಗೆ ಆಗಮಿಸಿದ್ದು, ಅವರ ನೋವು-ನಲಿವುಗಳಿಗೆ ಧ್ವನಿಯಾಗುತ್ತೇನೆ ಎಂದರು. 5 ಕೋಟಿ ರೂ. ವೆಚ್ಚದ ಹಂಗಾರಕಟ್ಟೆ ಮೀನುಗಾರಿಕೆ ಜಟ್ಟಿಯ ಬಹುತೇಕ ಕಾಮಗಾರಿ ಪೂರ್ಣಗೊಂಡಿದ್ದು, ಶೀಘ್ರದಲ್ಲಿ ಉದ್ಘಾಟನೆಗೊಳ್ಳಲಿದೆ ಎಂದರು.

ಈ ಸಂದರ್ಭ ಬಂದರು ಇಲಾಖೆಯ ಅಧಿಕಾರಿಗಳಾದ ಟಿ.ಎಸ್‌.ರಾಥೋಡ್‌, ಜಂಬೋಲೆ, ಕ್ಯಾಪ್ಟನ್‌ ಮೋಹನ್‌, ಜೇಯ್ಸ ಡಯಾಸ್‌, ನಾಗರಾಜ್‌ ಮತ್ತು ಮೀನುಗಾರ ಮುಖಂಡರಾದ ಕೇಶವ ಕುಂದರ್‌, ಸರಳಾ ಕಾಂಚನ್‌, ಉತ್ತರ ಎಂ.ಕರ್ಕೇರ, ಬಿ.ಬಿ.ಕಾಂಚನ್‌, ಪುಂಡರೀಕ್ಷ ಮುಂತಾದವರು ಉಪಸ್ಥಿತರಿದ್ದರು.

ದೀಪದಿಂದ ಸದ್ಭಾವನೆ ಬೆಳಕು ಬೆಳಗುತ್ತದೆ: ವಾದಿರಾಜ್‌ ಭಟ್‌

ಹೆರಂಜಾಲು:  ದೀಪವು ಜ್ಞಾನದ ಸಂಕೇತ, ದೀಪ ಬೆಳಗಿದಾಗ ಅಂತರಂಗದಲ್ಲಿ ಹೊಸತನವನ್ನು ತರುತ್ತದೆ. ಒಳ್ಳೆಯ ಕಾರ್ಯ ಒಳ್ಳೆಯ ಭಾವನೆ ಮೂಡಿದಾಗ ಆರೋಗ್ಯ, ಸಂಪತ್ತು ವೃದ್ಧಿಯಾಗುತ್ತದೆ. ಶತ್ರುಭಾವನೆ ನಾಶವಾಗುತ್ತದೆ. ಮನಸ್ಸಿನ ಅಂಧಕಾರ ನಮ್ಮೊಳಗೆ ನಿರಂತರ ಸದ್ಭಾವನೆಯ ಬೆಳಕು ಬೆಳಗುತ್ತದೆ.ಎಂದು ನಿವೃತ್ತ ಪ್ರಾಧ್ಯಾಪಕ, ಸಾಹಿತಿ ಪ್ರೊ|.ಕನರಾಡಿ ವಾದಿರಾಜ್‌ ಭಟ್‌ ಹೇಳಿದರು.

ಅವರು ಹೆರಂಜಾಲು ಮಹತೋಭಾರ ಶ್ರೀ ಗುಡೇ ಮಹಾಲಿಂಗೇಶ್ವರ ದೇವಾಲಯದಲ್ಲಿ  ನಡೆದ ಕುಂದಾಪುರ ತಾಲೂಕು ದ್ರಾವಿಡ ಬ್ರಾಹ್ಮಣ ಪರಿಷತ್ತು ಉಪ್ಪು³ಂದ ವಲಯದ 20ನೇ ವಾರ್ಷಿಕ ಅಧಿಧಿವೇಶನವನ್ನು ಉದ್ಘಾಟಿಸಿ ಮಾತನಾಡಿದರು.

ಪರಿಷರತ್ತಿನ ಸ್ಥಾಪಕಾಧ್ಯಕ್ಷ ಉಪ್ಪುಂದ ಚಂದ್ರಶೇಖರ ಹೊಳ್ಳ ಅವರು ಹಿಂದಿನ ಪದಾಧಿಧಿಕಾರಿಗಳನ್ನು ಸಮ್ಮಾನಿಸಿದರು. ವಲಯದ ಅಧ್ಯಕ್ಷ ರಾಜಾರಾಮ್‌ ಭಟ್‌ಯು.ಎಚ್‌. ಅಧ್ಯಕ್ಷತೆ ವಹಿಸಿದ್ದರು.

ಗೌರವಾಧ್ಯಕ್ಷ ಗಣೇಶ ಮಯ್ಯ ತಾಲೂಕು ಮಹಿಳಾ ವೇದಿಕೆ ಅಧ್ಯಕ್ಷೆ ಅನ್ನಪೂರ್ಣಾ ಉಡುಪ, ಕಾರ್ಯದರ್ಶಿ ಗಣೇಶ ಕಾರಂತ ಉಪಸ್ಥಿತರಿದ್ದರು,

ಕೋಶಾಧ್ಯಕ್ಷ ಅರುಣ ಕುಮಾರ ಶ್ಯಾನುಭೋಗ್‌ ಸ್ವಾಗತಿಸಿದರು, ಉಪಾಧ್ಯಕ್ಷ ಜಗದೀಶರಾವ್‌ ಪರಿಚಯಿಸಿದರು, ಪ್ರಶಾಂತ ಮಯ್ಯ ನಿರೂಪಿಸಿದರು. ಮಾಜಿಯುವ ವೇದಿಕೆ ಅಧ್ಯಕ್ಷ ಸಂದೇಶ ಭಟ್‌ ವಂದಿಸಿದರು.


ಸಮಾರೋಪ ಸಮಾರಂಭದಲ್ಲಿ  ಎಸ್‌ಎಸ್‌ಎಲ್‌ಸಿ ಮತ್ತು ಪಿಯುಸಿಯಲ್ಲಿ  ಅತೀ ಹೆಚ್ಚು ಅಂಕಗಳಿಸಿದ ಸಮಾಜದ ವಿದ್ಯಾರ್ಥಿಗಳನ್ನು ಸಮ್ಮಾನಿಸಲಾಯಿತು, ಹಾಗೂ ಉನ್ನತ ಶಿಕ್ಷಣ ಪಡೆಯುತ್ತಿರುವ 20 ವಿದ್ಯಾರ್ಥಿಗಳಿಗೆ ಸಹಾಯಧನ ಹಾಗೂ ಸ್ಪರ್ಧೆಗಳಲ್ಲಿ ವಿಜೇತರಾದವರಿಗೆ ಬಹುಮಾನ ವಿತರಿಸಲಾಯಿತು.

ಈ ಸಂದರ್ಭದಲ್ಲಿ ಧಾರ್ಮಿಕ ಕ್ಷೇತ್ರ ಹಾಗೂ ಪೊಲೀಸ್‌ ಇಲಾಖೆಯಲ್ಲಿ ನಿವೃತ್ತರಾದ ಪ್ರಭಾಕರ ಮೇರ್ಟಾ, ಶಿಕ್ಷಣ ಕ್ಷೇತ್ರದ ಸಾಧನೆಗಾಗಿ ಗಿರಿಜಾಮಯ್ಯ ಹಾಗೂ ಕೃಷಿ ಕ್ಷೇತ್ರದ ಸಾಧನೆಗಾಗಿ ವಿಜಯ ಹೆಗಡೆ ಅವರುಗಳನ್ನು ಪರಿಷತ್ತಿನ ವತಿಯಿಂದ ಸಮ್ಮಾನಿಸಲಾಯಿತು.

ಮುಖ್ಯ ಅತಿಥಿಗಳಾಗಿ ಸಂಸ್ಕೃತ ವಿದ್ವಾನ್‌ ಚನ್ನಕೇಶವ ಭಟ್‌ ಬಸ್ರೂರು, ತಾಲೂಕು ಕಾರ್ಯದರ್ಶಿ ಹಳ್ಳಿ ಶ್ರೀನಿವಾಸ ಭಟ್‌, ಕಿರಿಮಂಜೇಶ್ವರ ದೇವಳದ ಆಡಳಿತ ಕಾರ್ಯದರ್ಶಿ ಉಮೇಶ ಶ್ಯಾನುಭೋಗ್‌ ಭಾಗವಹಿಸಿದ್ದರು. ವಲಯದ ಅಧ್ಯಕ್ಷ ರಾಜರಾಮ್‌ ಭಟ್‌ ಯು.ಎಚ್‌. ಅಧ್ಯಕ್ಷತೆ ವಹಿಸಿದ್ದರು. ಗೌರವಾಧ್ಯಕ್ಷ ಗಣೇಶ ಮಯ್ಯ ಮಹಿಳಾ ವೇದಿಕೆ ಅಧ್ಯಕ್ಷೆ ಅನ್ನಪೂರ್ಣ ಉಡುಪ ವೇದಿಕೆಯಲ್ಲಿದ್ದರು, ಕಾರ್ಯದರ್ಶಿ ಗಣೇಶ ಕಾರಂತ ಸ್ವಾಗತಿಸಿದರು. ಊ.ನಾಗರಾಜ ಮೇರ್ಟಾ ಕಾರ್ಯಕ್ರಮ ನಿರೂಪಿಸಿದರು.ಸುನೀಲ್‌ ಹೊಳ್ಳ ಉಪ್ಪುಂದ ವಂದಿಸಿದರು.

ಜ.27: ಅತ್ತೂರು ಸಂತ ಲಾರೆನ್ಸ್ ಪುಣ್ಯಕ್ಷೇತ್ರದ ಜಾತ್ರೆ

ಉಡುಪಿ: ಕಾರ್ಕಳ ಅತ್ತೂರು ಸಂತ ಲಾರೆನ್ಸ್ ಪುಣ್ಯಕ್ಷೇತ್ರದಲ್ಲಿ ಜ.27,28 ಮತ್ತು 29ರಂದು ನಡೆಯುವ ವಾರ್ಷಿಕ ಮಹೋತ್ಸವಕ್ಕೆ ಸಕಲ ಸಿದ್ಧತೆಗಳು ಪೂರ್ಣಗೊಂಡಿವೆ. ಮೂರು ದಿನಗಳ ಉತ್ಸವದಲ್ಲಿ ಸುಮಾರು 15 ಲಕ್ಷ ಭಕ್ತಾದಿಗಳನ್ನು ನಿರೀಕ್ಷಿಸಲಾಗಿದೆ ಎಂದು ಕ್ಷೇತ್ರದ ಧರ್ಮಗುರು ವಂ.ಜಾರ್ಜ್ ಡಿಸೋಜಾ ತಿಳಿಸಿದರು. ಅವರು ಶುಕ್ರವಾರ ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದರು. 
     ಉಡುಪಿ ಕ್ರೈಸ್ತ ಧರ್ಮಪ್ರಾಂತ್ಯದ ಧರ್ಮಗುರು ಡಾ.ಜೆರಾಲ್ಡ್ ಐಸಾಕ್ ಲೋಬೊ ಅವರ ಮಾರ್ಗದರ್ಶನದಲ್ಲಿ ಸಕಲ ಸಿದ್ಧತೆ ಮಾಡಲಾಗುತ್ತಿದೆ. ದೇಶ- ವಿದೇಶದಿಂದ ಬರುವ ಯಾತ್ರಾರ್ಥಿಗಳ ಅನೂಕೂಲಕ್ಕಾಗಿ ಜ.25ರಿಂದ 35 ಬಲಿಪೂಜೆಗಳು ಹಾಗೂ 4 ವಿಶೇಷ ಬಲಿಪೂಜೆಗಳನ್ನು ಏರ್ಪಡಿಸಲಾಗಿದೆ. ಜ.26ರಂದು ಬೆಳಗ್ಗೆ 10 ಗಂಟೆಗೆ ಎಳೆ ಮಕ್ಕಳಿಗಾಗಿ ಹಾಗೂ ಸಂಜೆ 3-30ಕ್ಕೆ ಅಸ್ವಸ್ಥರು ಹಾಗೂ ಹಿರಿಯರಿಗಾಗಿ ವಿಶೇಷ ಬಲಿಪೂಜೆ ಆಯೋಜಿಸಲಾಗಿದೆ. ಮೂರು ದಿನವೂ ಬಲಿಪೂಜೆಯ ಬಳಿಕ ಅಸ್ವಸ್ಥರಿಗಾಗಿ ವಿಶೇಷ ಪ್ರಾರ್ಥನಾ ವಿಧಿಗಳು ನೆರವೇರಲಿವೆ ಎಂದರು. 
   ಯಾತ್ರಾರ್ಥಿಗಳ ವಾಹನಗಳ ಸುರಕ್ಷಿತ ನಿಲುಗಡೆಗಾಗಿ ದೂಪದ ಕಟ್ಟೆಯಲ್ಲಿ ಪಾರ್ಕಿಂಗ್ ವ್ಯವಸ್ಥೆ ಮಾಡಲಾಗಿದೆ. ಸುರಕ್ಷತೆ ದೃಷ್ಟಿಯಿಂದ ದೇವಾಲಯದ ಸುತ್ತಮುತ್ತ ಸಿಸಿಟಿವಿ ಅಳವಡಿಸಲಾಗಿದೆ. ಕ್ಯಾಥೋಲಿಕ್ ಭಕ್ತಾದಿಗಳ ಪಾಪ ನಿವೇದನೆಗೆ ವ್ಯವಸ್ಥೆ ಮಾಡಲಾಗಿದೆ. ಮಹೋತ್ಸವ ಸುಗಮವಾಗಿ ಸಾಗಲು ಸರಕಾರ ವಿವಿಧ ಕಾಮಗಾ ರಿಗಳಿಗೆ ವಿಶೇಷ ಅನುದಾನ ಒದಗಿಸಿದೆ. ಸ್ಥಳೀಯ ಶಾಸಕ, ಜಿಲ್ಲಾಡಳಿತ,ನಿಟ್ಟೆ ಗ್ರಾಪಂ ಉತ್ತಮ ಸಹಕಾರ ವ್ಯಕ್ತವಾಗಿದೆ ಎಂದು ಅವರು ಹೇಳಿದರು. ಸುದ್ದಿಗೋಷ್ಠಿಯಲ್ಲಿ ಚರ್ಚ್ ಪಾಲನಾ ಮಂಡಳಿಯ ಕಾರ್ಯದರ್ಶಿ ಸಂತೋಷ್ ಡಿಸಿಲ್ವಾ, ಉಪಾಧ್ಯಕ್ಷ ರಿಚಾರ್ಡ್ ಪಿಂಟೋ, ಡೇನಿಸ್ ಡೇಸಾ, ಜಾರ್ಜ್ ಕೆಸ್ತಲಿನೊ ಉಪಸ್ಥಿತರಿದ್ದರು. 

ಕೋಡಿ ಬ್ಯಾರಿಸ್ ಕಾಲೇಜು ವಾರ್ಷಿಕೋತ್ಸವ

ಕೋಡಿ: "ರಾಜಕೀಯದಲ್ಲಿ ಧರ್ಮ ಇರಬೇಕು ಆದರೆ ಧರ್ಮದಲ್ಲಿ ರಾಜಕೀಯ ಇರಬಾರದು" ಎಂದು ಕರ್ನಾಟಕ ರಾಜ್ಯ ನಗರಾಭಿವೃಧ್ಧಿ ಹಾಗೂ ಉಡುಪಿ ಜಿಲ್ಲಾ ಉಸ್ತುವಾರಿ ಸಚಿವರಾದ ಶ್ರೀ. ವಿನಯಕುಮಾರ್ ಸೊರಕೆಯವರು ಹೇಳಿದರು.
ಅವರು ಬ್ಯಾರೀಸ್ ಸಮೂಹ ಶಿಕ್ಷಣ ಸಂಸ್ಥೆಯ ವಾರ್ಷಿಕೋತ್ಸವ ಸಮಾರಂಭದಲ್ಲಿ ಮುಖ್ಯ ಅತಿಥಿಯಾಗಿ ಮಾತನಾಡುತ್ತಾ ಇಸ್ಲಾಂ ಧರ್ಮ ಶಾಂತಿ, ಸಮಾನತೆಯನ್ನು ಸಾರುವ ಧರ್ಮ. ಎಲ್ಲಾ ಧರ್ಮಗಳ ಸಾರಾಂಶವನ್ನು ತಿಳಿದುಕೊಳ್ಳುವುದು ಅತೀ ಮುಖ್ಯ. ಕೋಡಿ ಪ್ರದೇಶಕ್ಕೆ ಬೇಕಾದಂತಹ ವಿದ್ಯಾರ್ಜನೆಯನ್ನು ಬ್ಯಾರೀಸ್ ಸಮೂಹ ಶಿಕ್ಷಣ ಸಂಸ್ಥೆ ನೀಡುತ್ತಿದೆ. ವಿದ್ಯಾರ್ಜನೆ ನೀಡುವುದು ದೇವರ ಕೆಲಸ ಎಂದರು. 
ಗೌರವಾನ್ವಿತ ಅತಿಥಿಗಳಾದ ಕುಂದಾಪುರದ ಸಹಾಯಕ ಆಯುಕ್ತರಾದ ಕು.ಚಾರುಲತಾ ಸೋಮಲ್ ಮಾತನಾಡುತ್ತಾ " ಶಾಲೆ ಎನ್ನುವುದು ಎರಡನೆಯ ಮನೆ. ಶಾಲೆಯಲ್ಲಿ ವಿದ್ಯಾರ್ಥಿನಿಯರ ಬಗ್ಗೆ ಹೆಚ್ಚಿನ ಕಾಳಜಿ ವಹಿಸಿ, ದೈಹಿಕ ಬೆಳವಣಿಗೆಯ ಬಗ್ಗೆ ಗಮನ ಹರಿಸಬೇಕು. ವಿದ್ಯಾರ್ಥಿಗಳು ಮುಂದೆ ದೇಶವನ್ನಾಳುವವರು ಎಂದು ಅಭಿಪ್ರಾಯಪಟ್ಟರು. 
ರಾಷ್ಟ್ರೀಯ ಪ್ರಶಸ್ತಿ ವಿಜೇತರಾದ ಕುಂದಾಪುರ ಕ್ಷೇತ್ರ ಶಿಕ್ಷಣಾಧಿಕಾರಿಗಳಾದ ಶ್ರೀ ಗೋಪಾಲ ಶೆಟ್ಟಿ ಮಾತನಾಡಿ, " ನಾವು ಮಾಡುವ ವೃತ್ತಿಯನ್ನು ಪ್ರೀತಿಸಿ  ಗೌರವಿಸಬೇಕು. ನಾವು ಸಮಾಜದಲ್ಲಿ ತಲೆ ಎತ್ತಿ ನಿಲ್ಲಲು ನಾವು ಪಡೆದ ಶಿಕ್ಷಣವೇ ಕಾರಣ ಎನ್ನುವುದನ್ನು ಮರೆಯಬಾರದು. ನನ್ನ ಕನಸು ಕುಂದಾಪುರ ತಾಲೂಕನ್ನು ಶೈಕ್ಷಣಿಕ ತಾಲೂಕನ್ನಾಗಿ ಮಾಡುವುದು" ಎಂದರು.  
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ ಸಂಸ್ಥೆಯ ಅಧ್ಯಕ್ಷರಾದ ಹಾಜಿ ಮಾಸ್ಟರ್ ಮೆಹಮೂದ್ ಶುಭಕೋರಿದರು. 
ಬ್ಯಾರೀಸ್ ಸಮೂಹ ಶಿಕ್ಷಣ ಸಂಸ್ಥೆಯ ಸಂಚಾಲಕರಾದ ಶ್ರೀ ಸೈಯದ್ ಮೊಹಮ್ಮದ್ ಬ್ಯಾರಿಯವರು ಪ್ರಾಸ್ತಾವಿಕವಾಗಿ ಮಾತನಾಡುತ್ತಾ, " ಶಾಲೆ ಎಂಬುದು ಜ್ಞಾನದ ದೇಗುಲ. ಜಾತಿ ಧರ್ಮದ ನೆಲೆಯಲ್ಲಿ ಯಾವತ್ತೂ ಜಗಳ ಮಾಡಬಾರದು. ನಮ್ಮ ಪರಿಸರದಲ್ಲಿ ಕೋಮು-ಗಲಭೆಗೆ ಎಂದಿಗೂ ಅವಕಾಶ ನೀಡಬಾರದು. ಜಗಳ ಎಂದಿಗೂ ವೈಯಕ್ತಿಕವಾಗಿರಬೇಕು. ಧರ್ಮವನ್ನು ಯಾರೂ ತಮ್ಮ ಸ್ವಾರ್ಥಕ್ಕಾಗಿ ಬಳಸಿಕೊಳ್ಳುತ್ತಾರೆ. ಅದರಿಂದ ನಮ್ಮ ಧರ್ಮ ಹಾಳಾಗುತ್ತದೆ, ದೇಶ ಒಡೆದು ಹೋಗುತ್ತದೆ. ಮಾನವೀಯ ಅಲೆಯು, ಸಹಬಾಳ್ವೆಯ ನೆಲೆಯು, ಸಹಭಾಗಿತ್ವದ ಕಂಪು ಜಗಕ್ಕೆಲ್ಲಾ ಕಂಪು ತರಲಿ ಎಂದರು.
ಸಂಸ್ಥೆಯ ಆಡಳಿತ ನಿರ್ದೇಶಕರು ಹಾಗೂ ಪದವಿ ಕಾಲೇಜಿನ ಪ್ರಾಂಶುಪಾಲರಾದ ಪ್ರೊ. ದೋಮ ಚಂದ್ರಶೇಖರ್ ಸ್ವಾಗತಿಸಿ, ಯಾರು ಸೋಲನ್ನು ಅನುಭವಿಸುತ್ತಾರೋ ಅವರು ಮುಂದೆ ಗೆಲುವನ್ನು ಪಡೆಯುತ್ತಾರೆ ಎಂದರು. 
ತಾಲೂಕು ಪಂಚಾಯತ್ ಸದಸ್ಯರಾದ ಮಂಜು ಬಿಲ್ಲವ , ಪುರಸಭಾ ಸದಸ್ಯರಾದ ಸಂದೀಪ್ ಪೂಜಾರಿ, ಕೌನ್ಸೆಲರ್ ಪ್ರಭಾಕರ್ ಶೇರಿಗಾರ್, ಬ್ಯಾರೀಸ್ ಸೀ ಸೈಡ್ ಸ್ಕೂಲ್ ನ ಶಾಲಾಭಿವೃಧ್ಧಿ ಸಮಿತಿಯ ಸದಸ್ಯರಾದ ಅಬುಶೇಖ್, ಹಾಜಿ ಕೆ ಮೊಹಿದೀನ್ ಬ್ಯಾರಿ ಅನುದಾನಿತ ಪ್ರೌಢಶಾಲಾಭಿವೃಧ್ಧಿ  ಸಮಿತಿಯ ಸದಸ್ಯರಾದ ಮಾಧವ ಪೂಜಾರಿ, ಹಾಜಿ ಕೆ ಮೊಹಿದೀನ್ ಬ್ಯಾರಿ ಟ್ರಸ್ಟ್ ನ ಸದಸ್ಯರಾದ ಅಬ್ದುಲ್ ರೆಹಮಾನ್,  ಶ್ರೀನಿವಾಸ್ ಶೆಣೈ ಶಾಲಾಭಿವೃಧ್ಧಿ ಸಮಿತಿಯ ಎಲ್ಲಾ ಸದಸ್ಯರು  ಹಾಗೂ ಸಂಸ್ಥೆಯ ಎಲ್ಲಾ ಮುಖಂಡರು ಉಪಸ್ಥಿತರಿದ್ದರು. 
ಈ ಸಂದರ್ಭದಲ್ಲಿ ಸಂಸ್ಥೆಯ ವಾರ್ಷಿಕ ಸಂಚಿಕೆಯನ್ನು ಬಿಡುಗಡೆಗೊಳಿಸಿ, ತಾಲೂಕು, ರಾಜ್ಯ ಹಾಗೂ ರಾಷ್ಟ್ರಮಟ್ಟದಲ್ಲಿ ವಿಜೇತರಾದ ಎಲ್ಲಾ ವಿದ್ಯಾರ್ಥಿಗಳಿಗೂ ಬಹುಮಾನ ವಿತರಿಸಲಾಯಿತು. ಪದವಿ ಕಾಲೇಜಿನ ಹಿರಿಯ ಆಂಗ್ಲ ಉಪನ್ಯಾಸಕಿ ಶ್ರೀಮತಿ ಫ್ಲೇವಿಯಾ ರೆಬೆಲ್ಲೋ ಹಾಗೂ ಶಿಕ್ಷಕಿ ಜೆನ್ನಿಫರ್ ಕಾರ್ಯಕ್ರಮ ನಿರೂಪಿಸಿ, ಶಿಕ್ಷಕರಾದ ರವೀಂದ್ರ ಸ್ವಾಗತಿಸಿ, ಬಿ.ಎಡ್ ಕಾಲೇಜಿನ ಪ್ರಾಂಶುಪಾಲರಾದ ಸಿದ್ದಪ್ಪ ಕುಂಶಿ ವಂದಿಸಿದರು.

ಚಂದದಿ ಜರುಗಿತು ಚುಕ್ಕಿ ಚಂದ್ರಮ

ಕುಂದಾಪುರ: ವಿದ್ಯಾರ್ಥಿಗಳು ವಿಜ್ಞಾನದ ಬಗ್ಗೆ ಹೆಚ್ಚು ಆಸಕ್ತಿ ಮತ್ತು ಕುತೂಹಲ ಬೆಳೆಸಿಕೊಳ್ಳಬೇಕು. ಇವತ್ತು ವಿಜ್ಞಾನದ ಬಗ್ಗೆ ಕುತೂಹಲಗಳನ್ನು ಬಗೆಹರಿಸಿಕೊಳ್ಳಲು ಸಾಕಷ್ಟು ಅವಕಾಶಗಳು ಇರುವುದರಿಂದ ತಿಳಿದುಕೊಳ್ಳುವ ವೈಚಾರಿಕ ಮನೋಭಾವನ್ನು ರೂಢಿಸಿಕೊಳ್ಳಬೇಕು ಎಂದು ಉಡುಪಿಯ ಪೂರ್ಣಪ್ರಜ್ಞ ಕಾಲೇಜಿನ ಭೌತಶಾಸ್ತ್ರ ವಿಭಾಗದ ಮುಖ್ಯಸ್ಥರಾದ  ಡಾ.ಎ.ಪಿ ಭಟ್ ಹೇಳಿದರು.
ಕುಂದಾಪುರದ ಸಮುದಾಯ, ಕರ್ನಾಟಕ ರಾಜ್ಯ ವಿಜ್ಞಾನ ಪರಿಷತ್‌ನ ಉಡುಪಿ ಜಿಲ್ಲಾ ಘಟಕದ ಸಹಯೋಗದೊಂದಿಗೆ ಕುಂದಾಪುರದ ಭಂಡಾರ್ಕಾಸ್ ಕಾಲೇಜಿನಲ್ಲಿ ಆಯೋಜಿಸಲಾದ  ಚುಕ್ಕಿ ಚಂದ್ರಮ ಆಕಾಶ ವೀಕ್ಷಣೆ ಕಾರ್ಯಕ್ರಮದಲ್ಲಿ ಅವರು ಸಂಪನ್ಮೂಲ ವ್ಯಕ್ತಿಯಾಗಿ ಭಾಗವಹಿಸಿ ವಿದ್ಯಾರ್ಥಿಗಳಿಗೆ ಮಾಹಿತಿ ನೀಡಿದರು.
ಕುಂದಾಪುರ ಸಮುದಾಯದ ಅಧ್ಯಕ್ಷ  ಉದಯ ಗಾಂವ್ಕರ್ ಮಾತನಾಡಿ, ಅನುಮಾನ, ಪ್ರಶ್ನೆಗಳಿಂದ ವಿಜ್ಞಾನ ವಿಕಾಸಹೊಂದುತ್ತದೆ. ಜ್ಯೋತಿಷ್ಯದ ಮೂಲಕ ಹೆದರಿಸುವ ಪ್ರವೃತ್ತಿ ಇಂದು ಬೆಳೆಯುತ್ತಿದೆ. ಈ ಸಂದರ್ಭದಲ್ಲಿ ನಾವು ಪ್ರಗತಿಪರ ಆಲೋಚನೆಗಳನ್ನು ಮಾಡುವ ಮೂಲಕ ಕೌತುಕವನ್ನು ವಿಜ್ಞಾನದ ಮೂಲಕ ಪರಿಹರಿಸಿಕೊಳ್ಳಬೇಕು. ನಂಬಿಕೆಗಳಿಗೆ ಪುರಾವೆ ಬೇಡ ಆದರೆ ಜ್ಞಾನಕ್ಕೆ ಸೂಕ್ತ ಪುರಾವೆ ಬೇಕು. ಆ ನಿಟ್ಟಿನಲ್ಲಿ ಪ್ರಗತಿಪರ ಆಲೋಚನೆಗಳಿಗೆ ಅವಕಾಶ ಮಾಡಿಕೊಡುವುದು ಈ ಕಾರ್ಯಕ್ರಮ ಎಂದರು.
ಕರಾವಿಪನ ದಿನೇಶ ಶೆಟ್ಟಿಗಾರ್, ಭಂಡಾರ್ಕಾಸ್ ಕಾಲೇಜಿನ ಭೌತಶಾಸ್ತ್ರ ವಿಭಾಗದ ಕವಿತಾ ದೇವಿ ಶುಭ ಹಾರೈಸಿದರು. ಕುಂದಾಪುರ ಸರಕಾರಿ ಪದವಿಪೂರ್ವ ಕಾಲೇಜಿನ ಗಣಿತ ಉಪನ್ಯಾಸಕ ಕಿಶೋರ ಹಂದೆ ಸಂಪನ್ಮೂಲ ವ್ಯಕ್ತಿಯಾಗಿ ಭಾಗವಹಿಸಿದ್ದರು. ಸಮುದಾಯದ ಸದಾನಂದ ಬೈಂದೂರು ಕಾರ್ಯಕ್ರಮ ನಿರ್ವಹಿಸಿ, ವಂದಿಸಿದರು. ಸಭಾ ಕಾರ್ಯಕ್ರಮದ ನಂತರ ಪ್ರಾತ್ಯಕ್ಷಿಕೆ, ಸಂವಾದ, ಆಕಾಶ ಕಾಯಗಳ ವೀಕ್ಷಣೆ ನಡೆಯಿತು.

ಕಸಾಪ ಬೈಂದೂರು ಹೋಬಳಿಯಲ್ಲಿ ಅವ್ಯವಹಾರ: ತನಿಕೆಗೆ ಆಗ್ರಹಿಸಿ ಪ್ರತಿಭಟನೆ

ಬೈಂದೂರು: 2012ರಲ್ಲಿ ಬೈಂದೂರಿನಲ್ಲಿ ನಡೆದ ಕುಂದಾಪುರ ತಾಲೂಕು ಕನ್ನಡ ಸಾಹಿತ್ಯ ಸಮ್ಮೇಳನದ ಲೆಕ್ಕಪತ್ರಗಳಲ್ಲಿ ಅವ್ಯವಹಾರ ನಡೆದಿದೆ ಎಂಬ ಆರೋಪ ಕೇಳಿಬಂದ ಹಿನ್ನೆಲೆಯಲ್ಲಿ ಬೈಂದೂರು ಮಾನವ ಹಕ್ಕು ಜಾಗೃತಿ ಸಮಿತಿಯ ವತಿಯಿಂದ ಸೂಕ್ತ ತನಿಕೆಗೆ ಆಗ್ರಹಿಸಿ ಇಲ್ಲಿನ ತಹಸೀಲ್ದಾರರ ಕಛೇರಿಯ ಎದುರು ಪ್ರತಿಭಟನೆ ನಡೆಯಿತು. 
        ಪ್ರತಿಭಟನೆಯ ನೇತೃತ್ವ ವಹಿಸಿದ್ದ ಮಾನವ ಹಕ್ಕು ಜಾಗೃತಿ ಸಮಿತಿಯ ಅಧ್ಯಕ್ಷ ನವೀನ್‌ಚಂದ್ರ ಮಾತನಾಡಿ, ಕನ್ನಡ ಸಾಹಿತ್ಯ ಪರಿಷತ್ತು ಬೈಂದೂರು ಹೋಬಳಿಯ ಅಧ್ಯಕ್ಷರು ಸಮ್ಮೇಳನ ನಡೆದ ಇಲ್ಲಿಯ ತನಕ ಲೆಕ್ಕಪತ್ರ ಮಂಡಿಸಿಲ್ಲ, ಸಮ್ಮೇಳನಕ್ಕೆ ವಿವಿಧ ಸರಕು ಪೂರೈಸಿದವರಿಗೂ ಈವರೆಗೆ ಹಣ ಪಾವತಿಸಿಲ್ಲ. ಆದರೆ ಕ.ಸಾಪ. ಕೇಂದ್ರ ಸಮಿತಿಯಿಂದ ಮಂಜೂರಾದ ೧ ಲಕ್ಷ ರೂ. ಅನುದಾನದಲ್ಲಿ ೭೭೦೦೦ ಸಾವಿರವನ್ನು ಬೈಂದೂರು ಹೋಬಳಿ ಅಧ್ಯಕ್ಷ ಡಾ| ಸುಬ್ರಮಣ್ಯ ಭಟ್ ತನ್ನ ವೈಯಕ್ತಿಕ ಖಾತೆಗೆ ಜಮಾ ಮಾಡಿಕೊಂಡಿರುವುದು ದಾಖಲೆಗಳಿಂದ ಸ್ಪಷ್ಟವಾಗಿದೆ. ಈ ಕುರಿತು ಸೂಕ್ತ ತನಿಕೆ ನಡೆಸಿ ಸಮ್ಮೇಳನದಿಂದ ಬಾಕಿ ಇರುವ ಮೊತ್ತವನ್ನು ಸಂಬಂಧಿತರಿಗೆ ಒದಗಿಸಿಕೊಡಬೇಕು ಎಂದು ಅವರು ಆಗ್ರಹಿಸಿದರು.
      ಮನವಿಯನ್ನು ಬೈಂದೂರಿನ ವಿಶೇಷ ತಹಸೀಲ್ದಾರರ ಮೂಲಕ ಜಿಲ್ಲಾಧಿಕಾರಿಗಳಿಗೆ ಸಲ್ಲಿಸಲಾಯಿತು.
 ಪ್ರತಿಭಟನೆಯಲ್ಲಿ ಮಾನವ ಹಕ್ಕು ಜಾಗೃತಿ ಸಮಿತಿಯ ಕಾರ್ಯದರ್ಶಿ ರವೀಂದ್ರ ಶಾನುಭೋಗ್,  ಜಗದೀಶ ಪಟವಾಲ್, ಜನಾರ್ಧನ ಆಚಾರ್ ಹಾಗೂ ಊರ ಪ್ರಮುಖರು ಪಾಲ್ಗೋಂಡಿದ್ದರು.



ಇದಕ್ಕೆ ಪ್ರತಿಕ್ರಿಯಿಸಿರುವ ಡಾ| ಸುಬ್ರಹ್ಮಣ್ಯ ಭಟ್, ೨೦೧೨ರ ತಾಲೂಕು ಸಮ್ಮೇಳನದ ಖರ್ಚು ವೆಚ್ಚಗಳನ್ನು ಕಸಾಪದ ಕೋರಿಕೆಯ ಮೇರೆಗೆ ತನ್ನ ವೈಯಕ್ತಿಕ ಖಾತೆಯಿಂದ ನೀಡಿದ್ದು, ಕಸಾಪ ದ ಅನುದಾನ ದೊರೆತ ಬಳಿಕ ನಾನು ಸಮ್ಮೇಳನಕ್ಕೆ ಭರಿಸಿದ ಒಟ್ಟು ಖರ್ಚುವೆಚ್ಚಗಳನ್ನು ಬ್ಯಾಂಕ್ ಮೂಲಕ ಹಿಂಪಡೆದುಕೊಂಡಿರುವುದಾಗಿ ತಿಳಿಸಿದ್ದಾರೆ.



 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com