Pages

ಸ್ವಯಂ ಪ್ರೇರಿತ ಬೃಹತ್ ರಕ್ತದಾನ ಶಿಬಿರ

ಕುಂದಾಪುರ: ರಕ್ತ ಕೃತಕ ಸಷ್ಟಿ ಸಾಧ್ಯವಿಲ್ಲ. ಹೀಗಾಗಿ ರಕ್ತ ಯಾವತ್ತಿಗೂ ಅಮೂಲ್ಯ. ರಕ್ತದಾನ ಮಾಡುವುದರಿಂದ ಆರೋಗ್ಯಕ್ಕೆ ಯಾವುದೇ ಧಕ್ಕೆ ಇಲ್ಲ. ಪ್ರಯೋಜನವೇ ಹೆಚ್ಚು ಎಂದು ಕುಂದಾಪುರ ಸಹಾಯಕ ಕಮಿಷನರ್ ಯೋಗೇಶ್ವರ ಹೇಳಿದರು.     
  ಭಂಡಾರ್‌ಕಾರ್ಸ್‌ ಕಾಲೇಜಿನ ಆರ್.ಎನ್.ಶೆಟ್ಟಿ ಸಭಾಂಗಣದಲ್ಲಿ ಉಡುಪಿ ಜಿಲ್ಲಾ ಮೊಗವೀರ ಯುವ ಸಂಘಟನೆ, ಉಡುಪಿ ಜಿ.ಶಂಕರ್ ಫ್ಯಾಮಿಲಿ ಟ್ರಸ್ಟ್ ಅಂಬಲಪಾಡಿ, ಮಣಿಪಾಲ ಕೆಎಂಸಿ ಆಸ್ಪತ್ರೆ ರಕ್ತನಿಧಿ ವಿಭಾಗ, ಉಡುಪಿ ಜಿಲ್ಲಾಡಳಿತ, ಮೊಗವೀರ ಯುವ ಸಂಘಟನೆ ಕುಂದಾಪುರ ಘಟಕದ ಸಂಯುಕ್ತ ಆಶ್ರಯದಲ್ಲಿ  ನಡೆದ ಸ್ವಯಂ ಪ್ರೇರಿತ ಬೃಹತ್ ರಕ್ತದಾನ ಶಿಬಿರ ಉದ್ಘಾಟಿಸಿ ಅವರು ಮಾತನಾಡಿದರು.
    ಮೊಗವೀರ ಯುವ ಸಂಘಟನೆ ಕುಂದಾಪುರ ಘಟಕ ಅಧ್ಯಕ್ಷ ದಿವಾಕರ ಮೆಂಡನ್ ಅಧ್ಯಕ್ಷತೆ ವಹಿಸಿದ್ದರು. ರಕ್ತದಾನಿ ಸುರೇಂದ್ರ ಹಾಗೂ ಕಳೆದ ಬಾರಿಯ ರಕ್ತದಾನ ಶಿಬಿರ ಸಂಘಟಕ ರಮೇಶ್ ಅವರನ್ನು ಸನ್ಮಾನಿಸಲಾಯಿತು. ಈ ಬಾರಿಯ ರಕ್ತದಾನ ಶಿಬಿರದ ಸಂಯೋಜಕ ಅಶೋಕ್ ಚಂದನ್, ಪುರಸಭೆ ನಾಮ ನಿರ್ದೇಶನ ಸದಸ್ಯ ಶಿವರಾಮ ಪುತ್ರನ್, ಪ್ರಾಮಾಣಿಕತೆ ಮೆರೆದ ರಿಕ್ಷಾ ಚಾಲಕ ಕರುಣಾಕರ ಅವರನ್ನು ಗೌರವಿಸಲಾಯಿತು.
    ಪುರಸಭೆ ಅಧ್ಯಕ್ಷೆ ಯು.ಎಸ್.ಕಲಾವತಿ, ಜಿಲ್ಲಾ ಏಡ್ಸ್ ನಿಯಂತ್ರಣಾಧಿಕಾರಿ ಡಾ.ಅಶೋಕ್,ಜಿಲ್ಲಾ ಮೊಗವೀರ ಯುವ ಸಂಘಟನೆ ಅಧ್ಯಕ್ಷ ಸದಾನಂದ ಬಳ್ಕೂರು, ನಿಕಟಪೂರ್ವ ಅಧ್ಯಕ್ಷ ಜಯ ಕೋಟ್ಯಾನ್, ಪುರಸಭೆ ಸ್ಥಾಯಿ ಸಮಿತಿ ಅಧ್ಯಕ್ಷ ಉದಯ ಮೆಂಡನ್, ಜಿ.ಪಂ.ಸದಸ್ಯ ಪ್ರಕಾಶ್ ಟಿ.ಮೆಂಡನ್, ಮಣಿಪಾಲ ಕೆಎಂಸಿ ರಕ್ತನಿಧಿ ವಿಭಾಗದ ನಿರ್ದೇಶಕಿ ಡಾ.ಶಮಿ ಶಾಸ್ತ್ರೀ ಉಪ ಸ್ಥಿತರಿದ್ದರು. ಸುರೇಶ್ ವಿಠಲವಾಡಿ ಸ್ವಾಗತಿಸಿದರು. ಕೆ.ಕೆ.ಕಾಂಚನ್ ಪ್ರಾ ಸ್ತಾವಿಕ ಮಾತುಗಳನ್ನಾಡಿದರು. ಸುಧಾಕರ ಕಾಂಚನ್ ನಿರ್ವಹಿಸಿದರು.

ಲೋಕಯುಕ್ತ ತನಿಖೆಗೆ ವಾರಾಹಿ ನೀರಾವರಿ ಯೋಜನೆ

ಕುಂದಾಪುರ: ವಾರಾಹಿ ನೀರಾವರಿ ಯೋಜನೆ ಇನ್ನೂ ಪೂರ್ಣಗೊಳ್ಳದಿರವ ಬಗ್ಗೆ ಸಾರ್ವಜನಿಕ ದೂರು ಬಂದಿರುವ ಹಿನ್ನೆಲೆಯಲ್ಲಿ ಸಮಗ್ರ ತನಿಖೆಗೆ ಚಾಲನೆ ನೀಡಲಾಗುವುದು ಎಂದು ಕರ್ನಾಟಕ ಉಪಲೋಕಾಯುಕ್ತ ಸುಭಾಶ್ ಅಡಿ ತಿಳಿಸಿದ್ದಾರೆ. ವಾರಾಹಿ ಯೋಜನಾ ಪ್ರದೇಶಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ ನಂತರ ಅವರು ಶನಿವಾರ ಸಂಜೆ ಕುಂದಾಪುರ ಪ್ರವಾಸಿ ಮಂದಿರದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದರು. 

ವಾರಾಹಿ ನೀರಾವರಿ ಯೋಜನೆಗೆ ಹಲವು ಡೆಡ್‌ಲೈನ್ ನೀಡಲಾಗಿದ್ದರೂ ಯೋಜನೆ ಪೂರ್ಣಗೊಂಡಿಲ್ಲ. ಯೋಜನೆಯ ವೈಫಲ್ಯ ಕುರಿತಂತೆ ಕೋರ್ಟ್‌ಗೆ ಅನೇಕರು ಹೋಗಿದ್ದರೂ ಪ್ರಯೋಜನ ಆಗಿಲ್ಲ. ಒಂದು ಯೋಜನೆಗೆ 35 ವರ್ಷ ಬೇಕೆ ಎಂಬ ನೆಲೆಯಲ್ಲಿ ಯಡ್ಯಾಡಿ-ಮತ್ಯಾಡಿಯ ಗುರುರಾಜ ಕುಲಾಲ ಅವರು ಲೋಕಾಯುಕ್ತಕ್ಕೆ ದೂರು ನೀಡಿದ್ದು ದೂರಿನ ಹಿನ್ನೆಲೆಯಲ್ಲಿ ತನಿಖೆ ನಡೆಸಲಾಗುವುದು ಎಂದವರು ನುಡಿದರು. 

6 ತಿಂಗಳ ಹಿಂದೆ ವಿಧಾನಪರಿಷತ್ತಿನ ಸದನ ಸಮಿತಿ ವಾರಾಹಿ ಯೋಜನೆಯ ತನಿಖೆಗೆ ಶಿಫಾರಾಸು ಮಾಡಿರುವ ಬಗ್ಗೆ ನಮಗೆ ಯಾವುದೇ ಮಾಹಿತಿ ಇಲ್ಲ. ಗುರುರಾಜ ಕುಲಾಲ ನೀಡಿರುವ ದೂರು ದಾಖಲಿಸಿಕೊಳ್ಳಲಾಗಿದ್ದು ಕುಂದಾಪುರದ ಹಲವು ನ್ಯಾಯವಾದಿಗಳ ಹೇಳಿಕೆಯನ್ನು ದಾಖಲೀಕರಣಗೊಳಿಸಿಕೊಳ್ಳಲಾಗಿದೆ ಎಂದರು. 

ಹೊಸಂಗಡಿ ಕೆಪಿಸಿಎಲ್‌ನಿಂದ ಹೊರಬಿಟ್ಟ ನೀರನ್ನು ವಾರಾಹಿ ಡೈವರ್ಶನ್ ವಿಯರ್‌ನ ಮೂಲಕ ರೈತರ ಭೂಮಿಗೆ ಹರಿಸುವುದು ಯೋಜನೆಯ ಮೂಲ ಉದ್ದೇಶ. 1979ರಲ್ಲಿ ಯೋಜನೆ ಆರಂಭಗೊಂಡಿದೆ. 2004ರ ತನಕ ಯೋಜನೆಗೆ ಸಂಬಂಸಿದ ಯಾವುದೇ ಕೆಲಸ ಕಾರ್ಯಗಳು ನಡೆಯದಿದ್ದರೂ 34ಕೋಟಿ ರೂಪಾಯಿ ಖರ್ಚು ಮಾಡಲಾಗಿದೆ. ಕಾಮಗಾರಿಯ ಟೆಂಡರ್ ಕಂಡಿಶನ್ 18 ತಿಂಗಳಿಗೆ ನಿಗದಿಗೊಳಿಸಲಾಗಿದ್ದರೂ 35 ವರ್ಷ ಕಳೆದುಹೋಗಿದೆ. ಆದರೂ ಪ್ರಾಜೆಕ್ಟ್ ಪೂರ್ಣಗೊಂಡಿಲ್ಲ. ಯಾವುದೇ ಒಂದು ಯೋಜನೆ ಪೂರ್ಣತೆಗೆ 3 ದಶಕ ಬೇಕು ಅನ್ನುವುದು ಪ್ರಶ್ನಾರ್ಥಕ. 9 ಕೋಟಿ ರೂಪಾಯಿಯ ಮೂಲ ಯೋಜನೆಗೆ ಈಗಾಗಲೆ 569 ಕೋಟಿ ವ್ಯಯಿಸಲಾಗಿದೆ. ರೈತರ ಭೂಮಿಗೆ ನೀರು ಹರಿಸುವ ಬದಲು ರೈತರ ಭೂಮಿಯ ನಾಶ ನಡೆದಿದೆ. ಈ ಯೋಜನೆಯನ್ನೇ ನಂಬಿಕೊಂಡು ರೂಪಿಸಲ್ಪಟ್ಟ ಬ್ರಹ್ಮಾವರ ಸಕ್ಕರೆ ಕಾರ್ಖಾನೆ ಮುಚ್ಚಲ್ಪಟ್ಟಿದೆ. 2006ರಿಂದ 2008ರೊಳಗೆ ಯೋಜನೆ ಮುಗಿಯಬೇಕೆಂದಿತ್ತು ಎಂದು ನುಡಿದರು. 

ಉಡುಪಿ ಜಿಲ್ಲಾಕಾರಿ ಡಾ.ಮುದ್ದುಮೋಹನ್, ಕುಂದಾಪುರ ಸಹಾಯಕ ಕಮಿಷನರ್ ಯೋಗೇಶ್ವರ, ಉಡುಪಿ ಜಿಲ್ಲಾ ಪೊಲೀಸ್ ವರಿಷ್ಠಾಕಾರಿ ಡಾ.ಬೋರಲಿಂಗಯ್ಯ, ಕುಂದಾಪುರ ತಹಸೀಲ್ದಾರ ಗಾಯತ್ರಿ ಎನ್.ನಾಯಕ್ ಉಪಸ್ಥಿತರಿದ್ದರು.

-ವಿಕ ಕೃಪೆ

ರತ್ನಾ ಪ್ರಕರಣ ಸಿಓಡಿಗೊಪ್ಪಿಸಿ: ಸಂಸದೆ ಶೋಭಾ ಆಗ್ರಹ

ಬೈಂದೂರು: ಶಿರೂರು ವಿದ್ಯಾರ್ಥಿನಿ ರತ್ನ ಕೊಠಾರಿ ನಿಗೂಢ ಸಾವು ಪ್ರಕರಣವನ್ನು ಸಿಓಡಿ ತನಿಖೆಗೆ ಒಪ್ಪಿಸಬೇಕು ಎಂದು ಉಡುಪಿ- ಚಿಕ್ಕಮಗಳೂರು ಸಂಸದೆ ಶೋಭಾ ಕರಂದ್ಲಾಜೆ ಆಗ್ರಹಿಸಿದ್ದಾರೆ. ಶಿರೂರು ಆಲಂದೂರಿನ ಕೋಣನಮಕ್ಕಿಯಲ್ಲಿರುವ ವಿದ್ಯಾರ್ಥಿನಿ ರತ್ನ ಕೊಠಾರಿ ಮನೆಗೆ ಭಾನುವಾರ ಭೇಟಿ ನೀಡಿದ ಅವರು ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದರು. 

ರತ್ನಾ ಕೊಠಾರಿಯನ್ನು ಅತ್ಯಾಚಾರ ನಡೆಸಿ ಕೊಲೆ ಮಾಡಲಾಗಿದೆ. ಆದರೆ ಪೊಲೀಸರ ತನಿಖೆ ತಪ್ತಿದಾಯಕವಾಗಿಲ್ಲ. ಜಿಲ್ಲಾಡಳಿತವೂ ಗಂಭಿರವಾಗಿ ತೆಗೆದುಕೊಂಡಿಲ್ಲ, ಪ್ರಭಾವಿಗಳ ಕೈವಾಡದ ಶಂಕೆಯಿದ್ದು ಪ್ರಕರಣ ಮುಚ್ಚಿಹಾಕಲು ಷಡ್ಯಂತ್ರ ನಡೆಯುತ್ತಿದೆ ಎಂದು ಆಪಾದಿಸಿದರು. 

ವಿದ್ಯಾರ್ಥಿನಿ ಕುಟುಂಬಕ್ಕೆ ಬೈಂದೂರು ಬಿಜೆಪಿ ವತಿಯಿಂದ 1 ಲಕ್ಷ ರೂ. ಪರಿಹಾರ ನೀಡಲಾಗುವುದು ಅಲ್ಲದೇ ವಿದ್ಯಾರ್ಥಿನಿಯ ಅಣ್ಣನಿಗೆ ಖಾಸಗಿ ಉದ್ಯೋಗ ನೀಡಲು ವ್ಯವಸ್ಥೆ ಕಲ್ಪಿಸಲಾಗುವುದು ಎಂದರು. 

ಪ್ರಕರಣದ ಬಗ್ಗೆ ಈಗಾಗಲೇ ಗೃಹ ಮಂತ್ರಿ ಜಾರ್ಜ್ ಅವರಿಗೆ ಪತ್ರ ಬರೆಯಲಾಗಿದೆ. ಪರಿಹಾರ ಮೊತ್ತವನ್ನು 3 ಲಕ್ಷದಿಂದ 10 ಲಕ್ಷಕ್ಕೆ ಹೆಚ್ಚಿಸಬೇಕೆಂದು ಆಗ್ರಹಿಸಲಾಗಿದೆ. ಪ್ರಕರಣ ಬಯಲು ಮಾಡಲು ಸ್ಥಳೀಯ ಶಾಸಕರು ಸ್ಪಂದಿಸಬೇಕು ಎಂದು ಆಗ್ರಹಿಸಿದರು. 

ಜಿ.ಪಂ ಸದಸ್ಯರಾದ ಗೌರಿ ದೇವಾಡಿಗ, ಗೀತಾಂಜಲಿ ಸುವರ್ಣ, ಜಿಲ್ಲಾಧ್ಯಕ್ಷ ತಿಂಗಳೆ ವಿಕ್ರಮಾರ್ಜನ ಹೆಗಡೆ, ಬೈಂದೂರು ಕ್ಷೇತ್ರ ಬಿಜೆಪಿ ಅಧ್ಯಕ್ಷ ಬಿ.ಎಂ. ಸುಕುಮಾರ ಶೆಟ್ಟಿ, ಬಿಜೆಪಿ ಮುಖಂಡರಾದ ರಾಜೇಶ ಕಾವೇರಿ, ಶ್ಯಾಮಲಾ ಕುಂದರ, ದೀಪಕ್ ಕುಮಾರ ಶೆಟ್ಟಿ, ಗುರುರಾಜ ಗಂಟಿಹೊಳೆ, ಸದಾನಂದ ಉಪ್ಪಿನಕುದ್ರು, ಪುಷ್ಪರಾಜ ಶೆಟ್ಟಿ ಮತ್ತಿತರರು ಉಪಸ್ಥಿತರಿದ್ದರು. 

ಸಂಭ್ರಮದ ಕರ್ಕಾಟಕ ಅಮಾವಾಸ್ಯೆ ಜಾತ್ರೆ

ಮರವಂತೆ: ನದಿ-ಕಡಲ ಸಂಗಮದ ಅಪೂರ್ವ ತಾಣವಾಗಿದ್ದು, ವಿಶ್ವವಿಖ್ಯಾತಿ ಪಡೆದ ಮರವಂತೆ ಕಡಲತಡಿಯಲ್ಲಿರುವ ಪುರಾಣಪ್ರಸಿದ್ಧ ಮಹಾರಾಜ ಶ್ರೀ ವರಾಹ ಸ್ವಾಮಿ ದೇವಸ್ಥಾನದಲ್ಲಿ ಕರ್ಕಾಟಕ ಅಮಾವಾಸ್ಯೆ ಪ್ರಯುಕ್ತ ಜರುಗುವ ವಾರ್ಷಿಕ ಜಾತ್ರೆ ಶನಿವಾರ ಸಂಭ್ರಮ-ಸಡಗರದಿಂದ ನಡೆಯಿತು.

ನಸುಕಿನಿಂದಲೇ ಆಸುಪಾಸಿನ ಹಳ್ಳಿಗಳಿಂದ ಸಾವಿರಾರು ಸಂಖ್ಯೆಯಲ್ಲಿ ಆಗಮಿಸಿದ ಭಕ್ತರ ದಂಡು ಇಲ್ಲಿನ ರಾಷ್ಟ್ರೀಯ ಹೆದ್ದಾರಿಯಾಚೆಗಿನ ಸಮುದ್ರದಲ್ಲಿ ಸ್ನಾನಗೆ„ದು ಬಳಿಕ ಶ್ರೀ ವರಾಹ ಸ್ವಾಮಿ ದೇವಸ್ಥಾನದ ಬಳಿಯಿರುವ ಸೌಪರ್ಣಿಕಾ ನದಿಯಲ್ಲಿ ಸ್ನಾನಗೆ„ದು ಶ್ರೀದೇವರ ದರ್ಶನ ಪಡೆದು ಹರಕೆ ಸಲ್ಲಿಸಿದರು. ಕರ್ಕಾಟಕ ಅಮಾವಾಸ್ಯೆ ಜಾತ್ರೆಯ ಸಂಪ್ರದಾಯದಂತೆ ನವವಧುವರರು, ಕೃಷಿಕರು ಹಾಗೂ ಸ್ಥಳೀಯಭಾಗದ ಮೀನುಗಾರರು ಭಾರೀ ಸಂಖ್ಯೆಯಲ್ಲಿ ಆಗಮಿಸಿ ಶ್ರೀವರಾಹ ಸ್ವಾಮಿಗೆ ವಿಶೇಷ ಪೂಜೆಯನ್ನು ಸಲ್ಲಿಸಿದರು. ಕ್ಷೇತ್ರದ ಭಕ್ತರು ಈ ಸಂದರ್ಭದಲ್ಲಿ ವರ್ಷದ ಹರಕೆಯನ್ನು ಒಪ್ಪಿಸಿದರು.

ಭಕ್ತರು ಶ್ರೀ ದೇವರ ದರ್ಶನ, ಪೂಜೆ-ಪುನಸ್ಕಾರದಲ್ಲಿ ಸುಸೂತ್ರವಾಗಿ ಪಾಲ್ಗೊಳ್ಳಲು ಅನುಕೂಲವಾಗುವಂತೆ ದೇವಸ್ಥಾನದ ಆಡಳಿತ ಮಂಡಳಿಯು ಶಿಸ್ತುಬದ್ಧವಾದ ವ್ಯವಸ್ಥೆಯನ್ನು ಕೈಗೊಂಡಿತ್ತು. ಶ್ರೀದೇವರ ದರ್ಶನ ಪಡೆಯುವುದಕ್ಕಾಗಿ ಭಕ್ತಾದಿಗಳು ದೇವಸ್ಥಾನದಿಂದ ರಾಷ್ಟ್ರೀಯ ಹೆದ್ದಾರಿಯುದ್ದ ಸರತಿ ಸಾಲಿನಲ್ಲಿ ನಿಂತಿದ್ದ ದೃಶ್ಯ ಕಂಡುಬಂದಿತು. ಗಂಗೊಳ್ಳಿ ಠಾಣಾಧಿಕಾರಿ ಗೋವರ್ಧನ್‌ ಹಾಗೂ ಕುಂದಾಪುರ ಸಂಚಾರಿ ಪೋಲೀಸ್‌ ಅದಿಕಾರಿಗಳ ವಿಶೇಷ ಉಸ್ತುವಾರಿಯಲ್ಲಿ ಸಂಚಾರ ನಿಯಂತ್ರಣ ವ್ಯವಸ್ಥೆ ಕೈಗೊಳ್ಳಲಾಗಿತ್ತು.

ಬೆ„ಂದೂರು ಶಾಸಕ ಕೆ. ಗೋಪಾಲ ಪೂಜಾರಿ, ಜಿಲ್ಲಾ ಪಂಚಾಯತ್‌ ಸದಸ್ಯ ಕೆ. ಬಾಬು ಶೆಟ್ಟಿ, ಜಿಲ್ಲಾ ಪಂಚಾಯತ್‌ ಮಾಜಿ ಉಪಾಧ್ಯಕ್ಷ ರಾಜು ದೇವಾಡಿಗ ಮೊದಲಾದ ಗಣ್ಯರು ದೇವಸ್ಥಾನಕ್ಕೆ ಭೇಟಿ ನೀಡಿ ದೇವರ ದಶನವನ್ನು ಪಡೆದರು. ದೇವಸ್ಥಾನದ ವ್ಯವಸ್ಥಾಪನ ಸಮಿತಿ ಅಧ್ಯಕ್ಷ ಕೆ. ರಾಮಚಂದ್ರ ಹೆಬ್ಟಾರ್‌, ಸದಸ್ಯರಾದ ಅರ್ಚಕ ನರಸಿಂಹ ಅಡಿಗ, ಪ್ರಭಾಕರ ಮೊವಾಡಿ, ಗುಲಾಬಿ ಮೊಗವೀರ, ಶ್ರೀಮತಿ ಆಚಾರ್ಯ, ನರಸಿಂಹ ಖಾರ್ವಿ, ಶ್ರೀಧರ ಖಾರ್ವಿ, ರಾಮದಾಸ ಖಾರ್ವಿ, ರತ್ನಾಕರ ಹೆಬ್ಟಾರ್‌, ಧಾರ್ಮಿಕ ದತ್ತಿ ಇಲಾಖೆ ನಿರೀಕ್ಷಕ ಗಣೇಶ್‌ ರಾವ್‌ ಮೊದಲಾದವರು ಜಾತ್ರೆಯ ಸುವ್ಯವಸ್ಥೆಗೆ ಸಹಕರಿಸಿದರು. 50 ಸಾವಿರಕ್ಕೂ ಅದಿಕ ಸಂಖ್ಯೆಯಲ್ಲಿ ಭಕ್ತರು ಆಗಮಿಸಿದ್ದಾಗಿ ಆಡಳಿತ ಮಂಡಳಿ ತಿಳಿಸಿದೆ.

-ಉದಯವಾಣಿ

ಕಾರವಾರ-ಬೆಂಗಳೂರು ರೈಲು: ಅವಧಿ ಕಡಿತಕ್ಕೆ ಮನವಿ

ಬೈಂದೂರು: ಕಾರವಾರ-ಬೆಂಗಳೂರು ನಡುವೆ ಈಗ ಓಡುವ ರೈಲು ಸುತ್ತು ಬಳಸಿನ ದಾರಿಯಲ್ಲಿ ಚಲಿಸುತ್ತಿರುವುದರಿಂದ ಪ್ರಯಾಣಿಕರಿಗೆ ಅನನುಕೂಲವಾಗುತ್ತಿದೆ. ಅದನ್ನು ಬದಲಿ ಮಾರ್ಗವಾದ ಅರಸೀಕೆರೆ ಮೂಲಕ ಓಡಿಸಿ ಜನರಿಗೆ ಅನುಕೂಲ ಮಾಡಿಕೊಡಬೇಕೆಂದು ಬೈಂದೂರಿನ ಮೂಕಾಂಬಿಕಾ ರೈಲ್ವೇ ಯಾತ್ರಿ ಸಂಘ ಸಂಸದೆ ಶೋಭಾ ಕರಂದ್ಲಾಜೆ ಅವರನ್ನು ವಿನಂತಿಸಿದೆ.
    ಈ ರೈಲು ಮಂಗಳೂರು ಬಿಟ್ಟು ಬೆಂಗಳೂರು ತಲಪಲು 12 ಗಂಟೆ ತೆಗೆದುಕೊಂಡರೆ, ಉಡುಪಿಯ ಊರುಗಳಿಂದ 15 ಗಂಟೆ ತೆಗೆದುಕೊಳ್ಳುತ್ತದೆ. ಇದರಿಂದ ಪ್ರಯಾಣಿಕರಿಗೆ, ಮುಖ್ಯವಾಗಿ ವಿದ್ಯಾರ್ಥಿಗಳಿಗೆ ತೀವ್ರ ಸಮಯ ವ್ಯರ್ಥವಾಗುತ್ತದೆ. ಈ ಮಾರ್ಗದ ಹಾಸನ, ಕೆ.ಆರ್‌. ನಗರ, ಮೈಸೂರು ನಡುವಿನ ಜನರು ಈ ರೈಲಿನ ಬಳಕೆಗೆ ಆಸಕ್ತಿ ಹೊಂದಿಲ್ಲ. ಆದುದರಿಂದ ಈ ಮಾರ್ಗ ಬದಲಿಸಿದರೆ ಅವರಿಗೆ ತೊಂದರೆಯಾಗದು. ಬದಲಾಗಿ ಪ್ರಯಾಣದ ಅವಧಿ ಗಣನೀಯವಾಗಿ ಕಡಿಮೆಯಾಗುವುದು ಎಂದು ಸಂಘದ ಅಧ್ಯಕ್ಷ ಕೆ. ವೆಂಕಟೇಶ ಕಿಣಿ ಮನವಿಯಲ್ಲಿ ತಿಳಿಸಿದ್ದು, ಬದಲಿ ಮಾರ್ಗದ ಪರ್ಯಾಯ ವೇಳಾಪಟ್ಟಿ ಸೂಚಿಸಿದ್ದಾರೆ. ಈ ವಿಷಯವನ್ನು ಆದ್ಯತೆ ಎಂದು ಪರಿಗಣಿಸಿ ಬದಲಾವಣೆಗೆ ಕ್ರಮವಹಿಸಬೇಕು ಎಂದು ಅವರು ವಿನಂತಿಸಿದ್ದಾರೆ.

ಪ್ರತಿಭಟನ ಸ್ಥಳಕ್ಕೆ ಶಾಸಕ ಪೂಜಾರಿ ಭೇಟಿ

ಕುಂದಾಪುರ: ವಂಡ್ಸೆ ಗ್ರಾ.ಪಂ. ವ್ಯಾಪ್ತಿಯ ಆತ್ರಾಡಿ ಒಳಗೇರಿ ಗುಡ್ಡೆಯಲ್ಲಿ ಪ.ವರ್ಗ ಹಾಗೂ ಪ. ಜಾತಿ ಕುಟುಂಬದವರಿಗೆ ಕಾಯ್ದಿರಿಸಿದ ಭೂಮಿಯಲ್ಲಿ 2012ರಿಂದ ಕುಳಿತುಕೊಂಡಿರುವ ಕೊರಗ ಸಮುದಾಯದ 5 ಕುಟುಂಬದವರನ್ನು ಬಲವಂತವಾಗಿ ಒಕ್ಕಲೆಬ್ಬಿಸಿರುವ ವಿರುದ್ಧ ವಂಡ್ಸೆ ವಲಯದ ಕೊರಗ ಅಭಿವೃದ್ಧಿ ಸಂಘದ ನೇತೃತ್ವದಲ್ಲಿ ಸ್ಥಳೀಯ ಗ್ರಾ.ಪಂ. ಕಚೇರಿ ಎದುರು ಕಳೆದ 7 ದಿನಗಳಿಂದ ಅಹೋರಾತ್ರಿ ಪ್ರತಿಭಟನೆ ನಡೆಸುತ್ತಿದ್ದ ಸ್ಥಳಕ್ಕೆ ಶನಿವಾರ ಭೇಟಿ ನೀಡಿದ್ದ ಬೈಂದೂರು ಶಾಸಕ ಕೆ. ಗೋಪಾಲ ಪೂಜಾರಿ ಸಂತ್ರಸ್ತರೊಂದಿಗೆ ಮಾತುಕತೆ ನಡೆಸಿ ಅವರ ಅಹವಾಲು ಸ್ವೀಕರಿಸಿದರು.

ಇದೆ ಸಂದರ್ಭ ಮಾತನಾಡಿದ ಶಾಸಕರು, ಸಮಾಜದ ಕಟ್ಟ ಕಡೆಯ ವ್ಯಕ್ತಿಯನ್ನು ಮುಖ್ಯಮಾಹಿನಿಗೆ ತರಬೇಕು ಎನ್ನುವುದು ಸರಕಾರದ ಉದ್ದೇಶವಾಗಿದ್ದು, ಈ ನಿಟ್ಟಿನಲ್ಲಿ ಆತ್ರಾಡಿಯ ಒಳಗೇರಿ ಗುಡ್ಡೆಯಲ್ಲಿ ವಾಸವಾಗಿರುವ ಪರಿಶಿಷ್ಟ ವರ್ಗದ ಜನರಿಗೆ ನ್ಯಾಯ ದೊರಕಿಸುವ ನಿಟ್ಟಿನಲ್ಲಿ ತಾನು ಬದ್ಧತೆ ಹೊಂದಿರುವುದಾಗಿ ತಿಳಿಸಿದರು.

ಶಾಸಕ ಪೂಜಾರಿ ಅವರು ಸ್ಥಳದಿಂದಲೇ ಕುಂದಾಪುರದ ಕಂದಾಯ ಉಪವಿಭಾಗಾಧಿಕಾರಿ ಯೋಗೀಶ್ವರ ಹಾಗೂ ತಹಸೀಲ್ದಾರ್‌ ಗಾಯತ್ರಿ ನಾಯಕ್‌ ಅವರನ್ನು ಸಂಪರ್ಕಿಸಿ ಸಮಸ್ಯೆಯ ಗಂಭೀರತೆ ಬಗ್ಗೆ ತಿಳಿಸಿದರಲ್ಲದೆ, ಡಿ.ಸಿ. ಮನ್ನಾ ಭೂಮಿಯಲ್ಲಿ ಕುಳಿತುಕೊಂಡಿರುವ ಪರಿಶಿಷ್ಟ ವರ್ಗದ ಜನರನ್ನು ಒಕ್ಕೆಲೆಬ್ಬಿಸುವ ಹುನ್ನಾರದ ವಿರುದ್ಧ ಕ್ರಮ ತೆಗೆದುಕೊಳ್ಳಬೇಕು ಹಾಗೂ ಸ್ಥಳ ಪರಿಶೀಲನೆ ನಡೆಸಿ ಕಂದಾಯ ಇಲಾಖೆಯ ಡಿ.ಸಿ. ಮನ್ನಾ ಭೂಮಿಯಲ್ಲಿ ಕುಳಿತುಕೊಂಡಿರುವವರಿಗೆ ಹಕ್ಕು ಪತ್ರ ವಿತರಿಸಬೇಕು ಎಂದು ಸೂಚಿಸಿದರು.

ಈ ಸಂದರ್ಭ ವಂಡಬಳ್ಳಿ ಜಯರಾಮ ಶೆಟ್ಟಿ, ಉದಯ್‌ಕುಮಾರ ಶೆಟ್ಟಿ ಹಾಗೂ ಶ್ರೀನಿವಾಸ ಪೂಜಾರಿ ಮೊದಲಾದವರು ಉಪಸ್ಥಿತರಿದ್ದರು.
 
© Copyright 2013-14 Kundapura News - ಕುಂದಾಪ್ರ ಡಾಟ್ ಕಾಂ ಸುದ್ದಿ All Rights Reserved.
Template Design by Herdiansyah Hamzah | Sunil Byndoor * Powered by Kundapra Dot Com